انا رحت القلعة

من غير كلام كتير.. ومن غير مفاوضات واختيارات كتير.. إسمعوا كلام عمنا "أحمد فؤاد نجم".. يا بيغنيه "الشيخ امام" يا "نغم مصرى"... وعيطى يا بهية على القوانين


انا رحت القلعة و شفت ياسين
حواليه العسكر و الزنازين
و الشوم و البوم
و كلاب الروم
يا خسارة يا أزهار البساتين
عيطي يا بهية على القوانين

انا شفت شباب الجامعة الزين
احمد و بهاء
و الكردي و زين
حارمينهم حتى الشوف بالعين
و ف عز الضهر مغميين
عيطي يا بهية على القوانين

و قابلت سهام
في كلام إنسان
منقوش و مأثر في الجدران
عن مصر و عن عمال حلوان
مظاليم العهد المعتقلين
عيطي يا بهية على القوانين

و قابلت هناك
منذر و زياد
و قابلت كمان عزت و جواد
أربع أبطال
شنقوا الجلاد
"التل" يهوذا الفدائيين
زغرطي يا بلدنا لدول مساجين

و اسمعي يا بلدنا خلاصة القول
و بقولك أهه و أنا قد القول
مش ممكن كده حيحول الحول
على كده و الناس يفضلوا ساكتين
خليكوا فاكرين
خليكوا شاهدين
انا رحت القلعة و شفت ياسين